मुंबई : दिल्लीचा २२ वर्षीय वेगवान गोलंदाज हर्षित राणाचा न्यूझीलंडविरुद्धच्या कसोटी सामन्यासाठी भारतीय चमूत समावेश करण्यात आला आहे. त्यामुळे आता हर्षितला पदार्पणाची संधी मिळणार का, हे पाहणे रंजक ठरले.
तिसऱ्या आयपीएलमध्ये कोलकाता नाइट रायडर्स संघाकडून खेळताना यंदा हर्षितने छाप पाडली. त्याला बांगलादेश संघाविरुद्धच्या मालिकेसाठीही राखीव खेळाडूंत स्थान देण्यात आले होते. हर्षितला रणजी स्पर्धेतील आसामविरुद्धच्या लढतीसाठी दिल्ली संघातून सूट देण्यात आली आहे. त्यामुळे तो बुधवारपर्यंत मुंबईत दाखल होणार असल्याचे समजते.
हर्षितची ऑस्ट्रेलियाविरुद्ध होणाऱ्या बॉर्डर- गावस्कर कसोटी मालिकेसाठीही भारताच्या संघात निवड करण्यात आली आहे. त्यासाठीही ड्रेसिंग रूम वातावरणाची सवय व्हावी, म्हणून त्याला संधी दिली असावी, अशी चर्चा क्रीडाप्रेमींमध्ये रंगत आहे. त्याशिवाय जसप्रीत बुमराहला विश्रांती देत हर्षित व आकाश दीप वेगवान माऱ्याची धुरा वाहू शकतात.
दरम्यान, भारत-न्यूझीलंड तिसरी कसोटी शुक्रवार, १ नोव्हेंबरपासून मुंबईतील वानखेडे स्टेडियमवर खेळवण्यात येणार आहे. न्यूझीलंडने या मालिकेत २-० अशी विजयी आघाडी घेतली आहे. २२ नोव्हेंबरपासून भारत- ऑस्ट्रेलियातील पाच सामन्यांची कसोटी मालिका सुरू होईल.
विल्यम्सनची माघार
न्यूझीलंडचा फलंदाज केन विल्यम्सन स्नायूंच्या दुखापतीमुळे तिसऱ्या कसोटीलाही मुकणार आहे. आता तो इंग्लंडविरुद्ध २८ नोव्हेंबरपासून रंगणाऱ्या कसोटी मालिकेतच खेळताना दिसू शकेल.