साऊथहॅम्पटन : टी-२० मालिकेत यश संपादन केल्यानंतर आता एकदिवसीय मालिकेतही वर्चस्व राखण्यास भारतीय महिला संघ उत्सुक आहे. हरमनप्रीत कौरच्या नेतृत्वात खेळणारा भारतीय महिला संघ शनिवारी लॉर्ड्स स्टेडियमवर इंग्लंडविरुद्ध दुसरा एकदिवसीय सामना खेळणार आहे. त्यामुळे मालिकेत २-० अशी विजयी आघाडी घेण्याची भारताकडे उत्तम संधी आहे.
यंदा सप्टेंबर ते नोव्हेंबर महिन्यात भारतात महिलांची एकदिवसीय विश्वचषक स्पर्धा रंगणार आहे. त्यासाठी भारतीय संघ संघबांधणी करत आहे. मे महिन्यात श्रीलंका आणि दक्षिण आफ्रिका यांच्यासह झालेल्या तिरंगी एकदिवसीय मालिकेत भारताने सहज जेतेपद पटकावले. मुख्य म्हणजे त्या मालिकेत भारताने ३ वेळा ३००हून अधिक धावसंख्या उभारली. त्यामुळे आता इंग्लंडविरुद्धही भारतीय संघ हाच पवित्रा कायम राखणार का, हे पाहणे रंजक ठरेल. या मालिकेनंतर भारतीय संघ मायदेशात ऑस्ट्रेलियाविरुद्ध एकदिवसीय मालिका खेळणार आहे. त्यानंतर विश्वचषकाला प्रारंभ होणार असल्याने भारतीय महिलांकडे आता संघबांधणी करण्यासाठी फार कमी अवधी आहे. पहिल्या सामन्यात भारताने २५९ धावांचा यशस्वी पाठलाग करून विजयी सलामी नोंदवली.
“गेल्या १-२ वर्षांपासून आम्ही एकदिवसीय क्रिकेटमध्ये ३००हून अधिक धावा करण्यावर भर दिला आहे. यामुळे गोलंदाजांनाही दडपणमुक्त मारा करता येतो. जेव्हा आम्ही प्रथम फलंदाजी करतो, तेव्हा प्रतिस्पर्ध्यावर मोठ्या धावसंख्येचे दडपण आणण्यासाठी आम्ही प्रयत्नशील असतो. आता इंग्लंडमध्येही खेळपट्ट्यांचा आढावा घेत आम्ही रणनिती आखू,” असे हरमनप्रीत म्हणाली.
दरम्यान, हरमनप्रीतच्या नेतृत्वात भारताने नुकताच इंग्लंडमध्ये प्रथमच टी-२० मालिका जिंकली. तर २०२२मध्ये भारताने आधीच इंग्लंडला एकदिवसीय मालिकेतही पराभूत केले होते. भारतीय संघाची फलंदाजीत प्रतिका रावल, स्मृती मानधना, जेमिमा रॉड्रिग्ज यांच्यावर भिस्त आहे. फिरकीपटूंवर गोलंदाजीची मदार आहे. दीप्ती शर्मा व अमनजोत कौर या अष्टपैलूंचे योगदान मोलाचे ठरत आहे.
दुसरीकडे कर्णधार नॅट शीव्हर ब्रंट दुखापतीतून सावरत संघात परतल्याने इंग्लंडची चिंता कमी झाली आहे. डावखुरी फिरकीपटू सोफी एक्केलस्टोनचेही पुनरागमन झाले आहे. टॅमी ब्युमाँट, सोफीया डंकली या खेळाडूंकडून इंग्लंडला दमदार कामगिरी अपेक्षित आहे.
प्रतिस्पर्धी संघ
भारत : हरमनप्रीत कौर (कर्णधार), स्मृती मानधना, प्रतिका रावल, हरलीन देओल, जेमिमा रॉड्रिग्ज, रिचा घोष, यास्तिका भाटिया, तेजल हसबनीस, दीप्ती शर्मा, स्नेह राणा, श्री चरिणी, शुची उपाध्याय, अमनजोत कौर, अरुंधती रेड्डी, क्रांती गौड, सायली सतघरे.
इंग्लंड : नॅट शीव्हर ब्रंट (कर्णधार), एम अर्लोट, टॅमी ब्युमाँट, लॉरेन बेल, एलिस कॅप्सी, केट क्रॉस, एलिस रिचर्ड्स, चार्ली डीन, सोफिया डंकली, सोफी एक्केलस्टोन, लॉरेन फिलर, एमी जोम्स, एमा लम्ब, लिन्से स्मिथ, मिया बुचर.