पॅरिस : तिरंदाजीतील मिश्र सांघिक प्रकारात शीतल देवी व राकेश कुमार या जोडीने उपांत्य फेरी गाठली. त्यांनी उपांत्यपूर्व लढतीत इंडोनेशियाच्या ऑडी अयुदी व फॅरलिन केन या जोडीवर १५४-१४३ अशी मात केली.

शीतल-राकेश यांना या प्रकारात अग्रमानांकन लाभले आहे. आता उपांत्य फेरीत शीतल-राकेश यांच्यासमोर फातिमा हीमती व हाडी नोरी या इराणच्या जोडीचे आव्हान असेल. पायाने लक्ष्यभेद करणाऱ्या शीतलने एकेरीच्या उपउपांत्यपूर्व फेरीत स्थान मिळवले होते. मात्र तेथे तिला पदक जिंकण्यात अपयश आले. त्यामुळे आता मिश्र सांघिक प्रकारात तिच्याकडून पदक अपेक्षित आहे. तिरंदाजीत भारताने एकही पदक जिंकलेले नाही.

शीतलविषयी महत्त्वाचे

• जन्मापासूनच हात नसलेली शीतल पायाने लक्ष्यभेद करते. गेल्या वर्षी हांगझो येथे झालेल्या आशियाई पॅरा क्रीडा स्पर्धेतील चमकदार कामगिरीनंतर शीतल प्रकाशझोतात आली होती.

• त्या स्पर्धेत शीतलने दोन सुवर्णपदकांची कमाई केली होती आणि अशी कामगिरी करणारी ती भारताची पहिली महिला पॅरा-खेळाडू ठरली होती.

• तिने आणखी एक रौप्यपदकही पटकावले होते. आता पॅरालिम्पिकमध्येही पदक जिंकण्याचा तिचा मानस आहे.