राष्ट्रकुल क्रीडा स्पर्धेत सायकल ट्रॅकवर गेल्या चार दिवसांत दोन अपघात झाले. शर्यत सुरू असताना भारतीय सायकलपटू मीनाक्षीच्या अंगावरून प्रतिस्पर्धी खेळाडूची सायकल गेली.
महिलांच्या १० किलो मीटर ‘स्केच रन’ स्पर्धेदरम्यान मीनाक्षीला अपघात झाला. या अपघातात मीनाक्षी सायकलवरून घसरून ट्रॅकच्या कडेला पोहोचली. त्याचवेळी मागून येणारी न्यूझीलंडची सायकलपटू ब्रायोनी बोथाला आपला वेग नियंत्रित करता आला नाही. तिची सायकल मीनाक्षीच्या अंगावरून गेली. यानंतर बोथाही सायकलवरून खाली पडली.
अपघात होताच डॉक्टरांनी घटनास्थळी धाव घेतली. त्यांनी दोन्ही सायकलपटूंना ट्रॅकमधून बाहेर नेले. मीनाक्षीला स्ट्रेचरवर नेण्यात आले. मीनाक्षीच्या अपघाताचा व्हिडीओ सोशल मीडियावर व्हायरल होत आहे.
हरियाणाची रहिवासी असलेल्या मीनाक्षीने २०१९मध्ये सायकल चालविण्यास सुरुवात केली होती. त्यावर्षी झालेल्या राष्ट्रीय सायकलिंग अजिंक्यपद स्पर्धेत तिने शानदार कामगिरी केली होती. सर्वोत्तम कामगिरीमुळे तिची २०२०मध्ये भारतीय प्रशिक्षण शिबिरासाठी निवड झाली.
यावर्षी तिने आंतरराष्ट्रीय स्तरावर आशियाई ट्रॅक सायकलिंग अजिंक्यपद स्पर्धेत कांस्यपदक मिळविले.