ठाणे : महाराष्ट्रातील ऑटो रिक्षा व मीटर टॅक्सीचालकांच्या जीवनात स्थैर्य, सुरक्षितता आणि कल्याणकारी उपाययोजना आणण्यासाठी धर्मवीर आनंद दिघे यांच्या नावाने ‘महाराष्ट्र ऑटो रिक्षा व मीटर टॅक्सीचालक कल्याणकारी मंडळ’ चे मुख्य कार्यालय प्रादेशिक परिवहन कार्यालय, ठाणे येथे सुरू करण्यात आले आहे.

हा निर्णय परिवहन मंत्री प्रताप सरनाईक यांच्या १० सप्टेंबर रोजी झालेल्या महत्वाच्या बैठकीत घेण्यात आला. या निर्णयामुळे रिक्षा व टॅक्सीचालकांसाठी केवळ कल्याणकारी योजना नव्हे, तर शासकीय छत्राखाली एक विश्वासार्ह व्यासपीठ उपलब्ध झाले आहे. मंडळाच्या माध्यमातून आता सर्व चालकांना घरबसल्या ऑनलाइन सभासद नोंदणी करता येणार आहे. अधिकृत संकेतस्थळावर https://ananddighekalyankarimandal.org वाहन व परवाना क्रमांक, कुटुंबाची माहिती भरून आवश्यक कागदपत्रे अपलोड करता येतात. अर्जाची छाननी झाल्यानंतर सभासद शुल्क रु. ८०० ऑनलाइन भरून अंतिम पावती मिळवता येणार आहे. क्यू आर कोडद्वारे फोन पे किंवा गुगल पे वापरून सुरक्षित पेमेंटची सुविधा उपलब्ध करून देण्यात आली आहे.

ही संपूर्ण प्रक्रिया पारदर्शक, वेगवान आणि त्रुटीरहित ठेवण्यात आली असून, चुकीची माहिती भरल्यास ‘Edit Details’ बटणाद्वारे दुरुस्तीची सुविधा देखील आहे. प्रादेशिक परिवहन अधिकारी हेमांगिनी पाटील यांच्या मार्गदर्शनाखाली मंडळाचे कामकाज सुरू असून, उप प्रादेशिक परिवहन अधिकारी रोहित काटकर यांनी चालकांना फक्त अधिकृत वेबसाईटवरच विश्वास ठेवण्याची आणि बनावट लिंकपासून दूर राहण्याची सूचना केली आहे.