ठाणे : अल्पवयीन मुलीला टीव्ही बघण्यासाठी घरात बोलवून तिच्यावर अत्याचार करणाऱ्या ७५ वर्षीय मौनुद्दीन अजीजउल्ला अन्सारी या नराधमाला तीन वर्षांच्या कारावासाची शिक्षा सुनावण्यात आली आहे. ठाणे जिल्हा व सत्र न्यायालयाचे विशेष न्यायाधीश तसेच भिवंडी प्रथम वर्ग न्यायदंडाधिकारी एन. के. कारंडे यांनी गुरुवारी आरोपीला दोषी ठरविल्याची माहिती सरकारी वकील विजय मुंढे यांनी दिली.
भिवंडीत ९ नोव्हेंबर २०२१ रोजी ५ वर्षीय पीडित मुलगी दुपारच्या सुमारास आपल्या घराबाहेर खेळत होती. यावेळी शेजारी राहणाऱ्या आरोपी अन्सारी याने तिला टीव्ही पाहण्यासाठी त्याच्या घरात बोलवून तिच्यावर अत्याचार केला. याप्रकरणी पीडित मुलीच्या पालकांनी दिलेल्या तक्रारीनुसार शांतीनगर पोलीस ठाण्यात त्याच्याविरुद्ध पोक्सो कायद्यांतर्गत गुन्हा दाखल करण्यात आला. याप्रकरणी सरकारी वकील विजय मुंढे यांनी सादर केलेले पुरावे आणि साक्षीदारांची साक्ष ग्राह्य मानून अन्सारी याला दोषी ठरविण्यात आले. तसेच तीन वर्षांचा सश्रम कारावासाबरोबर ५ हजार दंड अशी शिक्षा सुनाविण्यात आली आहे. याप्रकरणी तत्कालीन सहाय्यक पोलीस निरीक्षक नितीन सूर्यवंशी यांनी तपास केला होता.