सण-उत्सव म्हटलं की घरात गोड पदार्थ केला जातोच. मात्र दरवेळी लाडू, शिरा किंवा खीर करण्याऐवजी यंदा ओल्या खोबऱ्यापासून तयार होणारा हा वेगळा हलवा करून पाहा. खोबरे, गूळ आणि साजूक तुपाचा वापर करून तयार होणारा हा हलवा चवीला खमंग आणि सुगंधी लागतो. काजू आणि खोबऱ्याचे काप वरून घातल्यामुळे त्याला छान टेक्स्चरही मिळते.
हलव्यासाठी काय लागेल?
ओल्या खोबऱ्याचा किस - २ कप
चिरलेला गूळ - १ कप
हिरवी वेलची - २ ते ३
तांदळाचे पीठ - १ मोठा चमचा
पाणी - अर्धा कप
साजूक तूप - २ मोठे चमचे + १ छोटा चमचा
ओल्या खोबऱ्याचे पातळ काप - आवश्यकतेनुसार
काजूचे तुकडे - २ मोठे चमचे
आधी खोबरे आणि गुळाचे मिश्रण तयार करा
मिक्सरमध्ये ओला खोबऱ्याचा किस, चिरलेला गूळ, वेलची, तांदळाचे पीठ आणि अर्धा कप पाणी घाला. हे मिश्रण एकसारखे आणि बारीक वाटून घ्या. तांदळाचे पीठ हलव्याला योग्य घट्टपणा आणण्यासाठी मदत करेल.
काजू आणि खोबऱ्याचे काप भाजा
कढईत दोन मोठे चमचे साजूक तूप गरम करा. त्यात काजूचे तुकडे आणि पातळ कापलेले खोबरे घालून हलके सोनेरी होईपर्यंत परता. हे मिश्रण एका प्लेटमध्ये काढून बाजूला ठेवा.
मंद आचेवर हलवा शिजवा
त्याच कढईत खोबरे आणि गुळाचे तयार केलेले मिश्रण घाला. गॅस मंद ठेवा आणि मिश्रण सतत ढवळत राहा. सुरुवातीला मिश्रण थोडे सैल असेल; शिजत गेल्यावर ते हळूहळू घट्ट होऊ लागेल.
कधी समजेल हलवा तयार झाला?
मिश्रण घट्ट होऊन कढईच्या कडा सोडू लागले की हलवा तयार होण्याच्या स्थितीत आहे. या वेळी भाजलेले काजू आणि खोबऱ्याचे काप त्यात मिसळा. शेवटी एक छोटा चमचा साजूक तूप घालून सर्व मिश्रण एकजीव करा.
गरमागरम किंवा थंड करून सर्व्ह करा
गॅस बंद केल्यानंतर हलवा थोडा निवू द्या. वरून काजू आणि खोबऱ्याचे काप घालून सर्व्ह करा. गूळ, खोबरे आणि तुपाची चव यामुळे हा गोड पदार्थ सणासुदीच्या मेन्यूमध्ये वेगळेपणा आणू शकतो.
