सध्या वाढत्या उन्हाच्या तीव्रतेमुळे त्वचेवर टॅनिंग, काळेपणा आणि निस्तेजपणा येण्याची समस्या सामान्य झाली आहे. अशा वेळी अनेक जण डी-टॅन (De-Tan) ट्रीटमेंटचा पर्याय निवडतात. डी-टॅन ही प्रक्रिया त्वचेवरील सूर्यप्रकाशामुळे तयार झालेला टॅन कमी करण्यास मदत करते. विशेषतः चेहरा, मान, हात आणि पाय यांसारख्या उघड्या भागांवरील त्वचा स्वच्छ आणि उजळ दिसण्यासाठी हा उपचार उपयुक्त मानला जातो.
तज्ज्ञांच्या मते, डी-टॅनमुळे त्वचेवरील मृत पेशी दूर होतात आणि त्वचेचा टोन काही प्रमाणात समसमान होतो. यामुळे त्वचेला नैसर्गिक चमक येण्यास मदत होते.
काही डी-टॅन पॅकमध्ये अँटीऑक्सिडंट्स आणि त्वचेला पोषण देणारे घटक असतात, जे त्वचेचे नुकसान कमी करण्यास सहाय्यक ठरतात. मात्र, ही प्रक्रिया कायमस्वरूपी गोरेपणा देत नाही, तर टॅनिंग कमी करण्यासाठी तात्पुरता उपाय ठरते.
तज्ज्ञ सांगतात की, डी-टॅन केल्यानंतर योग्य स्किनकेअर अत्यावश्यक आहे. बाहेर पडताना सनस्क्रीनचा वापर, पुरेसे पाणी पिणे आणि त्वचेची नियमित स्वच्छता राखणे गरजेचे आहे.
संवेदनशील त्वचा असलेल्या व्यक्तींनी कोणतीही ट्रीटमेंट घेण्यापूर्वी त्वचारोग तज्ज्ञांचा सल्ला घ्यावा. योग्य मार्गदर्शनाखाली डी-टॅन केल्यास त्वचा अधिक निरोगी, तजेलदार आणि फ्रेश दिसू शकते.
(Disclaimer: यामध्ये दिलेले आरोग्यविषयक सल्ले सामान्य मार्गदर्शनासाठी आहेत. नवशक्ति' यातून कोणताही दावा करत नाही.)
