उन्हाळा सुरू झाला की घराघरांत मसाले तयार करण्याची लगबग सुरू होते. लाल तिखट, हळद, धणे पूड असे विविध मसाले करून साठवले जातात. पण हे मसाले वर्षभर ताजे, सुगंधी आणि खराब न होता कसे टिकवायचे, हा अनेकांचा प्रश्न असतो. योग्य काळजी घेतली नाही तर मसाल्यांचा वास कमी होतो, किड लागते किंवा ते लवकर खराब होतात. म्हणूनच मसाले बनवतानाच आणि साठवताना काही सोप्या गोष्टी लक्षात ठेवल्या, तर त्यांची चव आणि गुणवत्ता दीर्घकाळ टिकून राहू शकते.
काचेच्या बरण्यांचा वापर करा
मसाले साठवण्यासाठी काचेच्या एअरटाइट बरण्या हा सर्वोत्तम पर्याय मानला जातो. प्लास्टिकच्या डब्यांमध्ये मसाले ठेवल्यास त्यांचा सुगंध लवकर उडून जातो. काचेच्या बरण्यांमुळे मसाल्यांचा नैसर्गिक वास आणि गुणवत्ता टिकून राहते.
सूर्यप्रकाशापासून दूर ठेवा
मसाले नेहमी थेट सूर्यप्रकाशापासून दूर ठेवावेत. जास्त प्रकाशामुळे मसाल्यांचा रंग फिका पडतो आणि त्यांची चवही कमी होते. त्यामुळे मसाले साठवण्यासाठी अंधारी आणि कोरडी जागा निवडणे अधिक योग्य ठरते.
हिंगाचा वापर करा
लाल तिखट किंवा इतर मसाल्यांमध्ये छोटासा हिंगाचा तुकडा ठेवला, तर त्यात किड लागत नाही. ही पारंपरिक आणि प्रभावी पद्धत असून अनेक घरांमध्ये अजूनही वापरली जाते.
ओल्या हातांनी मसाले हाताळू नका
मसाले काढताना किंवा वापरताना हात पूर्णपणे कोरडे असणे अत्यंत गरजेचे आहे. ओलसर हातामुळे मसाल्यांमध्ये ओलावा जाऊन ते लवकर खराब होऊ शकतात. त्यामुळे नेहमी कोरड्या चमच्याचा वापर करा.
स्वयंपाकघरातच योग्य साठवणूक
मसाले गॅसजवळ किंवा उष्णतेच्या ठिकाणी ठेवणे टाळा. उष्णतेमुळे मसाल्यांची गुणवत्ता घटते. शक्यतो थंड आणि कोरड्या ठिकाणीच त्यांची साठवणूक करावी.
स्वयंपाकात चव टिकवायची असेल, तर मसाल्यांची योग्य साठवणूक ही तितकीच महत्त्वाची आहे. छोट्या-छोट्या गोष्टींची काळजी घेतल्यास मसाले अधिक काळ ताजे राहतात आणि अन्नाची चवही दुप्पट होते.
