उन्हात फिरल्यामुळे हात, पाय आणि मानेवर टॅनिंग (त्वचेचा रंग उन्हामुळे गडद होणे) दिसू लागते. अशावेळी त्वचेची स्वच्छता आणि निगा राखण्यासाठी अनेक जण महागड्या बॉडी पॉलिशिंग ट्रिटमेंटचा पर्याय निवडतात. मात्र, त्वचेची काळजी घेण्यासाठी प्रत्येक वेळी महागड्या उत्पादनांवर पैसे खर्च करण्याची गरज नाही. स्वयंपाकघरात सहज उपलब्ध असलेल्या मसूर डाळीच्या पिठापासून घरच्या घरी बॉडी स्क्रब तयार करता येऊ शकतो. त्यात काही साधे घटक मिसळून त्वचेवरील मृत पेशी स्वच्छ करण्यासाठी त्याचा वापर करता येतो. हा स्क्रब कसा तयार करायचा आणि वापरताना कोणती काळजी घ्यायची, जाणून घेऊया.
घरच्या घरी हा स्क्रब तयार करण्यासाठी पुढील साहित्य घ्या.
मसूर डाळीचे पीठ - २ चमचे
तांदळाचे पीठ - २ चमचे
मध - १ चमचा
बदाम तेल - १ चमचा
सौम्य फेसवॉश - १ चमचा
बॉडी स्क्रब कसा तयार करायचा?
सर्वप्रथम एका स्वच्छ भांड्यात मसूर डाळीचे पीठ आणि तांदळाचे पीठ एकत्र करा. त्यानंतर त्यात मध आणि बदाम तेल घाला. बदाम तेल उपलब्ध नसल्यास, थोडे खोबरेल तेल वापरू शकता. शेवटी सौम्य फेसवॉश घालून सर्व साहित्य व्यवस्थित मिसळा.
त्वचेवर स्क्रब लावण्याची योग्य पद्धत
तयार केलेले मिश्रण त्वचेवर थोड्या भागात लावून आधी तपासून पाहा. त्रास जाणवत नसल्यास ते ओलसर त्वचेवर हलक्या हाताने लावा. त्वचेवर जोरात घासणे टाळा. काही वेळानंतर पाण्याने स्वच्छ धुवा आणि त्वचेला अनुकूल मॉइश्चरायझर लावा.
मात्र, संवेदनशील त्वचा, पुरळ, जखमा किंवा त्वचेची जळजळ असल्यास हा स्क्रब वापरणे टाळा. मसूर डाळ किंवा तांदळाचे पीठ घासल्याने मृत पेशी स्वच्छ होण्यास मदत होऊ शकते.
बॉडी पॉलिशिंगऐवजी हा घरगुती उपाय किती उपयोगी?
मसूर डाळीचे पीठ आणि तांदळाचे पीठ यांचा वापर घरगुती स्क्रबमध्ये केला जातो. मध आणि तेलामुळे मिश्रणात ओलावा टिकवून ठेवण्यास मदत होऊ शकते. मात्र, घरगुती स्क्रब आणि व्यावसायिक बॉडी पॉलिशिंग ट्रिटमेंट यांचा परिणाम सारखा असेलच असे नाही. त्वचेवर कोणताही नवीन पदार्थ वापरण्यापूर्वी पॅच टेस्ट करा आणि त्रास जाणवल्यास वापरणे थांबवा. त्वचेची समस्या असल्यास त्वचारोगतज्ज्ञांचा सल्ला घ्या.
