श्रावणात उपवास म्हटलं की साबुदाणा खिचडी, साबुदाणा वडा असे पदार्थ हमखास केले जातात. पण रोज तेच पदार्थ खाऊन कंटाळा आला असेल, तर यावेळी साबुदाण्यापासून काहीतरी वेगळं करून पाहा. कमी साहित्यामध्ये झटपट तयार होणारं आणि बाहेरून कुरकुरीत, आतून मऊ असं साबुदाणा थालीपीठ उपवासाच्या ताटाची चव नक्कीच वाढवेल.
साहित्य -
१ वाटी साबुदाणा
२ उकडलेले बटाटे
१ वाटी शेंगदाण्याचा कूट
१-२ हिरव्या मिरच्या
चवीनुसार मीठ
थोडी काळीमिरी पावडर
तूप
कृती -
सर्वप्रथम साबुदाणा स्वच्छ धुवून पाण्यात रात्रभर भिजत ठेवा. सकाळी उरलेलं पाणी पूर्णपणे काढून साबुदाणा बाजूला ठेवा.
यानंतर बटाटे उकडून त्यांची साल काढा आणि ते चांगले मॅश करून घ्या. त्यामध्ये भिजवलेला साबुदाणा, शेंगदाण्याचा कूट, हिरव्या मिरचीची पेस्ट, मीठ आणि काळीमिरी पावडर घाला. हे सर्व साहित्य एकत्र करून घट्टसर मिश्रण तयार करा.
आता या मिश्रणाचा एक गोळा घ्या. ओल्या कापडावर किंवा रुमालावर थापून थालीपीठाचा आकार द्या. थालीपीठ थापताना ते फार जाड ठेवू नका, म्हणजे ते छान कुरकुरीत होईल.
गरम तव्यावर थालीपीठ अलगद सोडा आणि दोन्ही बाजूंनी भाजून घ्या. बाजूने थोडं तूप सोडलं की थालीपीठ आणखी खुसखुशीत होईल.
दोन्ही बाजूंनी छान सोनेरी आणि कुरकुरीत झालं की गरमागरम साबुदाणा थालीपीठ तयार! हे थालीपीठ काकडीच्या कोशिंबिरीसोबत खाल्लं तर चव आणखी खुलते.
