काबूल / इस्लामाबाद : पाकिस्तान आणि अफगाणिस्तान यांच्यात सुरू असलेल्या युद्धाबाबत कतारमधून एक महत्त्वाचे वृत्त आले आहे. दोहा येथे आयोजित शांतता चर्चेत पाकिस्तान आणि अफगाणिस्तान यांनी तत्काळ युद्धविरामाला सहमती दर्शविली आहे.
तुर्कियेच्या मध्यस्थीने सुरू असलेल्या या चर्चेचे उद्दिष्ट आठवडाभर चाललेल्या भीषण सीमा संघर्षाचा अंत करणे आहे. ज्यामध्ये अनेक लोक मृत्युमुखी पडले आहेत आणि शेकडो जखमी झाले आहेत. कतारच्या निवेदनानुसार, दोन्ही बाजूंनी येत्या काही दिवसांत युद्धबंदीची स्थिरता सुनिश्चित करणे, त्याची विश्वासार्ह आणि शाश्वत पद्धतीने अंमलबजावणी करण्यासाठी बैठका घेण्याचे मान्य केले आहे.
नेत्यांमध्ये चर्चा
२०२१ मध्ये काबूलमध्ये तालिबान सत्तेवर परत आल्यानंतर पाकिस्तान आणि अफगाणिस्तान या दोन शेजाऱ्यांमध्ये सध्या सर्वाधिक तणावाचे संबंध आहेत. अफगाणिस्तानचे संरक्षण मंत्री मुल्ला मुहम्मद याकूब यांच्या नेतृत्वाखालील काबूल प्रतिनिधीमंडळाने दोहा चर्चेत भाग घेतला, तर पाकिस्तानचे संरक्षणमंत्री ख्वाजा मुहम्मद आसिफ यांनी तालिबान प्रतिनिधींसोबत चर्चेचे नेतृत्व केले.
पाकिस्तानचा आरोप
पाकिस्तानच्या परराष्ट्र मंत्रालयाने म्हटले आहे की, ही चर्चा अफगाणिस्तानमधून पाकिस्तानविरोधात सुरू असलेला सीमा पार दहशतवाद थांबवण्यावर आणि पाक-अफगाण सीमारेषेवर शांतता व स्थैर्य पुन्हा प्रस्थापित करण्यासाठी तातडीचे उपाय शोधण्यावर केंद्रित होती. ही हिंसा त्यावेळी सुरू झाली जेव्हा इस्लामाबादने अफगाणिस्तानकडे अशा दहशतवाद्यांवर कारवाई करण्याची मागणी केली, जे सीमापार पाकिस्तानात हल्ले करत होते.
तालिबानचे उत्तर
तालिबानने दहशतवाद्यांना आश्रय दिल्याचे स्पष्टपणे नाकारले आणि पाकिस्तानवर अफगाणिस्तान अस्थिर करण्यासाठी खोट्या बातम्या पसरवण्याचा तसेच इस्लामिक स्टेटशी संबंधित गटांना पाठिंबा देण्याचा आरोप केला. इस्लामाबादने हे आरोप फेटाळून लावत म्हटले की, दहशतवाद्यांनी पाकिस्तानी सरकार उलथवून टाकण्यासाठी आणि कठोर इस्लामी शासन लागू करण्यासाठी अनेक वर्षांपासून मोहीम सुरू केलेली आहे.