ना मुरंबा, ना लोणचं! हिवाळ्यात आवळा आणि गुळापासून बनवा चविष्ट लाडू; चवीला हटके, करायलाही सोपे 'एआय'ने बनविलेली प्रातिनिधिक प्रतिमा
लाईफस्टाईल

ना मुरंबा, ना लोणचं! हिवाळ्यात आवळा आणि गुळापासून बनवा चविष्ट लाडू; चवीला हटके, करायलाही सोपे

नेहमीचे मुरंबा,लोणचं असे पदार्थ खाण्याऐवजी यंदा आवळ्यापासून काहीतरी वेगळं करून पाहायचं असेल, तर आवळ्याचे लाडू हा चांगला पर्याय ठरू शकतो.

Mayuri Gawade

हिवाळा सुरू झाला की बाजारात ताजे आवळे सहज उपलब्ध होतात. आवळा हा व्हिटॅमिन सी आणि अँटीऑक्सिडंट्सचा चांगला स्रोत असल्यामुळे अनेकजण त्याचा आहारात समावेश करतात. काही जण आवळ्याचा रस पितात, तर काहींच्या घरी आवळ्याचा मुरंबा किंवा लोणचे आवडीने खाल्ले जाते. मात्र, नेहमी तेच पदार्थ खाण्याऐवजी यंदा आवळ्यापासून काहीतरी वेगळं करून पाहायचं असेल, तर आवळ्याचे लाडू हा चांगला पर्याय ठरू शकतो.

आवळ्याचा आंबटपणा, गुळाचा गोडवा, खोबरे आणि सुकामेव्याची चव यामुळे हे लाडू स्वादिष्ट लागतात. शिवाय घरात उपलब्ध असलेल्या साहित्यापासून ते सहज तयार करता येतात. जाणून घेऊया आवळ्याचे लाडू बनवण्याची सोपी पद्धत.

आवळ्याचे लाडू बनवण्यासाठी साहित्य

  • आवळे - १ किलो

  • गूळ - ८०० ग्रॅम

  • साजूक तूप - ५० ग्रॅम

  • किसलेले सुके खोबरे - १ कप

  • वेलची पूड - चवीनुसार

  • सुंठ पावडर - चवीनुसार

  • काजू, बदाम आणि मनुका - बारीक चिरून

आवळ्याचे लाडू बनवण्याची कृती

१. आवळ्याची पूर्वतयारी करा : सर्वप्रथम आवळे स्वच्छ पाण्याने धुवून घ्या. त्यावरील पाणी पूर्णपणे पुसून किंवा सुकवून घ्या. त्यानंतर किसणीच्या मदतीने आवळे किसून घ्या. किसताना बिया वेगळ्या काढून टाका.

२. गुळाचा पाक तयार करा : जाड बुडाच्या कढईत गूळ घालून मंद आचेवर गरम करा. गूळ वितळून त्याचा पाक तयार होऊ लागला की त्यात किसलेला आवळा घाला. मिश्रण सतत ढवळत राहा, जेणेकरून ते कढईच्या तळाला चिकटणार नाही.

३. मसाले आणि सुकामेवा मिसळा : आवळा आणि गुळाचे मिश्रण घट्ट होऊ लागले की त्यात किसलेले खोबरे, वेलची पूड, सुंठ पावडर आणि बारीक चिरलेला सुकामेवा घाला. त्यानंतर साजूक तूप घालून सर्व साहित्य व्यवस्थित एकत्र करा.

४. मिश्रण थंड करून लाडू वळा : मिश्रण घट्ट झाल्यावर गॅस बंद करा आणि ते थोडे कोमट होऊ द्या. हाताला थोडे तूप लावून मिश्रणाचे छोटे-छोटे लाडू वळा. लाडू पूर्णपणे थंड झाल्यावर स्वच्छ, कोरड्या आणि हवाबंद डब्यात भरून ठेवा.

आवळ्याचे लाडू खाताना या गोष्टी लक्षात ठेवा

आवळ्यामध्ये व्हिटॅमिन सी आणि अँटीऑक्सिडंट्स असतात. सुकामेव्यामधून काही प्रमाणात प्रथिने, चांगले फॅट्स आणि खनिजे मिळतात. त्यामुळे या लाडूंमधून वेगवेगळ्या पोषक घटकांचा आहारात समावेश होऊ शकतो. मात्र, गुळाचे प्रमाणही यात जास्त असल्याने लाडू मर्यादित प्रमाणात खावेत. मधुमेह असलेल्या व्यक्तींनी आहारात त्यांचा समावेश करण्यापूर्वी डॉक्टर किंवा आहारतज्ज्ञांचा सल्ला घ्यावा.

साठवणूक टिप : लाडू पूर्णपणे थंड झाल्यानंतरच डब्यात ठेवा. डबा स्वच्छ आणि कोरडा असावा. लाडू काढताना नेहमी कोरडा चमचा किंवा हात वापरा. त्यात ओलावा जाणार नाही याची काळजी घ्या. साठवणुकीचा कालावधी लाडूंमधील ओलावा आणि ठेवण्याच्या पद्धतीवर अवलंबून असतो.

Thane : मुंब्रा रेल्वे स्थानकाजवळील दुकानातील मिठाईतून विषबाधा? पाच जणांची प्रकृती बिघडली, एकाचा मृत्यू, FDA कडून तपास सुरू

Diljit Dosanjh Indore Concert : दिलजीतच्या कॉन्सर्टमध्ये चोरट्यांचा धुमाकूळ; गर्दीचा फायदा घेत मोबाईल लंपास, दोघांना अटक

भंडाऱ्यात लालपरीचा अजब कारभार; रात्रीच्या अंधारात दोन विद्यार्थिनींना अर्ध्या रस्त्यात उतरवलं, पालकांचा संताप, चालक-वाहक निलंबित

Raigad Fire : उरणमध्ये केमिकलच्या गोदामाला भीषण आग! मोठ्या स्फोटाने परिसर हादरला; धुराचे लोट हवेत, VIDEO

छठपूजेचा प्रसाद खाल्ल्याने आईचा संताप अनावर; चार वर्षांच्या चिमुरडीला बेदम मारहाण, उपचारादरम्यान मृत्यू