Skin Care Tips : रात्रीची वेळ त्वचेसाठी महत्त्वाची असते. दिवसभराचा थकवा आणि धूळ-मातीचा परिणाम दूर करून त्वचेला स्वच्छ आणि मॉइश्चराइज ठेवणे गरजेचे असते. मात्र, रात्रीच्या स्किन केअर रुटीनमध्ये काही चुका झाल्यास त्वचा कोरडी, निस्तेज होण्यासोबतच मुरुम आणि सुरकुत्यांसारख्या समस्या वाढू शकतात. त्यामुळे रात्रीच्या वेळी 'या' तीन चुका टाळणे महत्त्वाचे आहे.

१. चेहऱ्यावर मेकअप ठेवून झोपणे

रात्री चेहऱ्यावर मेकअप, धूळ किंवा दिवसभराची घाण तशीच ठेवून झोपणे ही त्वचेसाठी मोठी चूक ठरू शकते. यामुळे छिद्रे बंद होऊन मुरुम, ब्लॅकहेड्स आणि व्हाइटहेड्सची समस्या वाढू शकते. त्वचा सतत अशा पद्धतीने स्वच्छ न केल्यास ती निस्तेज दिसू लागते. त्यामुळे झोपण्यापूर्वी चेहरा व्यवस्थित स्वच्छ करणे आवश्यक आहे.

२. मॉइश्चरायझर न लावणे

त्वचा तेलकट आहे म्हणून रात्री मॉइश्चरायझरची गरज नाही, असा अनेकांचा गैरसमज असतो. मात्र, त्वचेच्या प्रकारानुसार योग्य मॉइश्चरायझर वापरणे महत्त्वाचे आहे. मॉइश्चरायझर न लावल्यास त्वचा कोरडी, खरखरीत आणि निस्तेज दिसू शकते. त्वचेतील ओलावा टिकवण्यासाठी रात्री योग्य मॉइश्चरायझर किंवा नाईट क्रीमचा वापर करता येतो.

३. चुकीची स्किन केअर उत्पादने वापरणे

त्वचेच्या प्रकाराला न जुळणारे किंवा खूप कठोर घटक असलेले फेसवॉश, क्रीम किंवा इतर उत्पादने वापरल्यास त्वचेच्या नैसर्गिक संरक्षणात्मक थरावर परिणाम होऊ शकतो. त्यामुळे लालसरपणा, जळजळ, कोरडेपणा किंवा संवेदनशीलता वाढू शकते. म्हणूनच त्वचेच्या प्रकारानुसार सौम्य आणि योग्य उत्पादने निवडणे गरजेचे आहे.

रात्रीची स्किन केअर रुटीन कशी असावी?

झोपण्यापूर्वी चेहरा सौम्य फेसवॉशने स्वच्छ करा. त्यानंतर त्वचेच्या प्रकारानुसार मॉइश्चरायझर, जेल किंवा नाईट क्रीम लावा. सीरम किंवा टोनर वापरत असल्यास ते त्वचेला योग्य आहे की नाही, याची खात्री करूनच वापरा. नवीन उत्पादन वापरण्यापूर्वी पॅच टेस्ट करणेही फायदेशीर ठरू शकते.

रात्रीची स्किन केअर रुटीन फार गुंतागुंतीची असण्याची गरज नाही. चेहरा स्वच्छ ठेवणे, त्वचेला योग्य मॉइश्चरायझर देणे आणि त्वचेच्या प्रकाराला न जुळणारी उत्पादने टाळणे या साध्या गोष्टी नियमित केल्यास त्वचा निरोगी आणि तजेलदार ठेवण्यास मदत होऊ शकते.

(Disclaimer: यामध्ये दिलेले आरोग्यविषयक सल्ले सामान्य मार्गदर्शनासाठी आहेत. नवशक्ति' यातून कोणताही दावा करत नाही.)