आजच्या धावपळीच्या जीवनशैलीत महिलांमध्ये अनेक आरोग्य समस्या वाढताना दिसत आहेत. त्यामध्ये ब्रेस्ट कॅन्सर (स्तनाचा कर्करोग) हा गंभीर आजार म्हणून समोर येत आहे. पूर्वी हा आजार प्रामुख्याने जास्त वयाच्या महिलांमध्ये आढळत असे. मात्र आता तरुण महिलांमध्येही ब्रेस्ट कॅन्सरची प्रकरणे वाढताना दिसत आहेत. महिला दिनाच्या निमित्ताने महिलांनी आपल्या आरोग्याकडे अधिक जागरूकतेने पाहणे गरजेचे आहे.

ब्रेस्ट कॅन्सर का होतो?

तज्ज्ञांच्या मते, ब्रेस्ट कॅन्सर होण्यामागे अनेक कारणे असू शकतात. अनुवंशिकता (Genetic कारणे) हे त्यातील एक महत्त्वाचे कारण मानले जाते. याशिवाय अस्वस्थ जीवनशैली, जास्त प्रमाणात जंक फूडचे सेवन, व्यायामाचा अभाव, वाढलेले वजन आणि हार्मोन्समध्ये होणारे बदल यामुळेही ब्रेस्ट कॅन्सरचा धोका वाढू शकतो. काही वेळा मद्यपान, धूम्रपान आणि उशिरा लग्न किंवा उशिरा मातृत्व यांचाही परिणाम होऊ शकतो.

ब्रेस्ट कॅन्सरची लक्षणं कोणती?

ब्रेस्ट कॅन्सरची काही सुरुवातीची लक्षणे ओळखल्यास वेळेत उपचार करणे शक्य होते. स्तनामध्ये गाठ जाणवणे, स्तनाचा आकार किंवा त्वचेमध्ये बदल दिसणे, स्तनाग्रातून स्त्राव होणे, स्तनामध्ये वेदना किंवा सूज येणे ही काही महत्त्वाची लक्षणे मानली जातात. अशी लक्षणे आढळल्यास तात्काळ डॉक्टरांचा सल्ला घेणे आवश्यक आहे.

कॅन्सरचा धोका कमी करण्यासाठी उपाय

ब्रेस्ट कॅन्सर टाळण्यासाठी नियमित व्यायाम, संतुलित आहार आणि आरोग्यदायी जीवनशैली महत्त्वाची भूमिका बजावते. आहारामध्ये फळे, हिरव्या पालेभाज्या, प्रथिनेयुक्त पदार्थ आणि फायबरयुक्त अन्न यांचा समावेश करणे फायदेशीर ठरते. तसेच जंक फूड, जास्त साखर आणि प्रक्रिया केलेले पदार्थ कमी खाणे आवश्यक आहे.

नियमित तपासणीही तितकीच महत्त्वाची

महिलांनी नियमितपणे स्तनांची स्वतः तपासणी (Self Breast Examination) करणे आणि गरज भासल्यास डॉक्टरांकडून तपासणी करून घेणे महत्त्वाचे आहे. योग्य वेळी निदान झाल्यास ब्रेस्ट कॅन्सरवर उपचार करणे शक्य होते. त्यामुळे महिला दिनाच्या निमित्ताने महिलांनी आपल्या आरोग्याबाबत सजग राहणे आणि वेळोवेळी तपासणी करणे आवश्यक आहे.