बारामती : ग्रामपंचायत निवडणुकीसाठी मतदान करायला आलेल्या उपमुख्यमंत्री अजित पवार यांच्या मातोश्री आशा पवार यांनी ‘‘माझ्या देखतच अजित पवारांनी मुख्यमंत्री व्हावं” अशी इच्छा सर्वांसमोर बोलून दाखवली. त्यांच्या या वक्तव्यामुळे राजकीय वर्तुळात पुन्हा एकदा अजित पवार यांच्या मुख्यमंत्रीपदाची चर्चा सुरू झाली आहे. डेंग्यूमुळे आजारी असलेले अजित पवार मात्र मतदानासाठी येऊ शकले नाहीत.
अजितदादांच्या पत्नी सुनेत्रा पवार आणि मातोश्री आशाताई पवार यांनी रविवारी सकाळी काटेवाडी येथील मतदान केंद्रावर मतदानाचा हक्क बजावला. यानंतर आशा पवार यांनी माध्यमांशी संवाद साधला. पत्रकारांनी आशा पवार यांना अजितदादांच्या मुख्यमंत्रीपदाबाबत प्रतिक्रिया विचारली. यावेळी त्या म्हणाल्या, ‘‘दादाने माझ्यादेखत मुख्यमंत्री व्हावं, असे वाटते. दादावर लोकांचे प्रेम आहे, पण पुढचं काय सांगता येतं? सर्वांना वाटतं की, दादाने मुख्यमंत्री व्हावे. मी आता ८६ वर्षांची आहे. त्यामुळे माझ्या डोळ्यादेखत मुलाने मुख्यमंत्री व्हावे, असे वाटते. कोणास ठाऊक इच्छा पूर्ण होईल की नाही, असे भावनिक विधान आशा पवार यांनी केले.