मुरुड जंजिरा : मुरुड येथील ऐतिहासिक जंजिरा किल्ला पर्यटकांसाठी १४ ऑक्टोबरपासून खुला होणार आहे. गेल्या दीड महिन्यापासून स्वच्छतेच्या कामामुळे पर्यटकांसाठी बंद ठेवला होता. ही बाब खासदार सुनील तटकरे यांच्या निदर्शनास आणून दिल्यावर त्यांनी पुरातत्त्व विभागाचे सहाय्यक संवर्धक अधिकारी बजरंग येलीकर यांना किल्ला सुरू करण्याचे निर्देश दिले.
किल्ला पर्यटकांसाठी खुला होत नसल्याने पर्यटक नाराज होऊन परत जात होते. त्यामुळे येथील रोजगारावर मोठा परिणाम होत होता.
सुमारे २२ एकर क्षेत्रावर पसरलेला आणि सुमारे ४० फूट उंच तटबंदीने वेढलेला जंजिरा किल्ला हे रायगड जिल्ह्यातील प्रमुख ऐतिहासिक पर्यटनस्थळ आहे. दरवर्षी लाखो पर्यटक या किल्ल्याला भेट देतात. पावसाळ्यात पर्यटकांच्या सुरक्षेच्या दृष्टीने शासनाकडून किल्ला बंद ठेवण्यात येतो.
पर्यटकांच्या सुरक्षिततेला प्राधान्य देत पुरातत्त्व विभागाने किल्ल्याचे दरवाजे बंद ठेवून चारही बाजूंना कामगार लावून स्वच्छतेचे काम सुरू केले. मात्र, गेल्या दीड महिन्यापासून हे काम सुरू असल्याने किल्ला पर्यटकांसाठी खुला होण्यास विलंब होत होता.