सिंधुदुर्ग : शिरोडा-वेळागर येथील समुद्रात शुक्रवारी सायंकाळी पावणेपाचच्या दरम्यान ८ पर्यटक बुडाल्याची खळबळजनक घटना घडली. या दुर्घटनेत तिघांचा मृत्यू झाला असून चौघे जण बेपत्ता आहेत, तर एक जण अत्यवस्थ आहे. या दुर्घटनेत इसरा कित्तूर ही मुलगी बचावली असून तिला शिरोडा ग्रामीण रुग्णालयात दाखल करण्यात आले आहे.
शिरोडा येथील वेळागर समुद्रकिनाऱ्यावर पर्यटनासाठी आलेल्या कुडाळ-पिंगुळी येथील कित्तूर व मणियार कुटुंबातील सदस्यांवर शुक्रवारी काळाने झडप घातली. या समुद्रात या कुटुंबातील आठ जण पाण्यात बुडाले. या दुर्घटनेनंतर तातडीने बचावकार्य सुरू करण्यात आले. बचाव पथकाला तीन व्यक्तींचे मृतदेह सापडले. तर कुटुंबातील एका मुलीला वाचवण्यात यश आले असून तिला पुढील उपचारांसाठी उपजिल्हा रुग्णालयात दाखल करण्यात आले आहे.
या दुर्घटनेत फरहान इरफान कित्तूर (३४), इबाद इरफान कित्तूर (१३), नमीरा आफताब अख्तर (१६) यांचा मृत्यू झाला असून इसरा इम्रान कित्तूर (१७) ही बचावली आहे, तर इरफान मोहम्मद इसाक कित्तूर, इक्वान इमरान कित्तूर, फरहान मोहम्मद मणियार, जाकीर निसार मणियार हे चौघे जण बेपत्ता आहेत. या दुर्घटनेमुळे कित्तूर व मणियार कुटुंबातील उर्वरित सदस्यांना मोठा मानसिक धक्का बसला आहे.
घटनास्थळी पोलीस, महसूल व ग्रामीण विकास विभागाची यंत्रणा कार्यरत झाली असून प्रशासकीय यंत्रणा व स्थानिक शोध व बचाव पथकामार्फत बेपत्ता पर्यटकांचा शोध सुरू आहे.