मुंबई : दुसऱ्या लग्नानंतर पहिल्या पत्नीपासून झालेल्या १० वर्षांच्या अल्पवयीन सावत्र मुलीचा मानसिक व शारीरिक छळ तसेच क्रूरतेने वागणूक दिल्याप्रकरणी सावत्र आई कविता हितेश भानुशाली हिच्याविरुद्ध नवघर पोलिसांनी गुन्हा नोंदविला आहे. या गुन्ह्यांचा तपास सुरु असून लवकरच आरोपी आईची पोलिसांकडून चौकशी होणार आहे.
मुलुंडमध्ये राहणाऱ्या तक्रारदाराने २०१२साली माधुरीसोबत लग्न केले. मात्र दोघांचे पटत नसल्याने त्यांनी २०१६ साली विभक्त होण्याचा निर्णय घेतला. मात्र घटस्फोटानंतर १० वर्षांची मुलगी वडिलांसोबत राहत होती. २०१७मध्ये त्यांचे कवितासोबत दुसरे लग्न झाले. कविता हिचेही पहिले लग्न तुटले असून तिलाही १० वर्षांची मुलगी आहे. मात्र पती-पत्नीमध्ये सारखे खटके उडत असत. अखेर पहिल्या पत्नीपासून झालेली मुलगी मामाकडे गेल्यानंतर सावत्र आई तिचा छळ करत असल्याचे समोर आले. चौकशीदरम्यान कविताने तिचा २७ एप्रिल २०१८ ते २९ जुलै २०२३ या कालावधीत अनेकदा मानसिक व शारीरिक छळ केला होता. तिला क्रुरतेने वागणुक दिली होती. हा प्रकार समजताच कविता भालुशालीविरुद्ध पोलिसांनी भादवीसह अल्पवयीन न्याय कायदा कलमांतर्गत गुन्हा नोंदविला आहे.