मुंबई : धारावीचा पुनर्विकास करणारी धारावी रिडेव्हलपमेंट ' प्रोजेक्ट प्रायव्हेट लिमिटेड (डीआरपीपीएल) कंपनी आता 'नवभारत मेगा डेव्हलपर्स प्रायव्हेट लिमिटेड' (एनएमडीपीएल) या नव्या नावाने ओळखली जाणार आहे.
कॉर्पोरेट क्षेत्रात नवी ओळख निर्माण करतानाच सर्वसमावेशक विकासाची आपली कटिबद्धता अधोरेखित करण्यासाठी कंपनीने हा महत्त्वाचा बदल केला आहे. नवभारत मेगा डेव्हलपर्स प्रायव्हेट लिमिटेड' या नावातून अद्यावत, सर्वसमावेशक आणि मूल्याधारित समाजाची निर्मिती करण्याचे कंपनीचे ध्येय प्रतिबिंबित होत असल्याचे मानले जाते.
नवभारत मेगा डेव्हलपर्स यातून शाश्वत विकास, सकारात्मक बदल यासाठी असलेली कंपनीची वचनबद्धता दिसून येते. तसेच या नामांतराला कंपनीच्या संचालक मंडळाने आणि कंपनी व्यवहार मंत्रालयाने (मिनिस्ट्री ऑफ कॉर्पोरेट अफेअर्स) देखील मान्यता दिली आहे. हा बदल, पुनर्विकासातील लाभार्थ्यांच्या भविष्यासोबतच झोपडपट्टीमुक्त उज्वल देशाला करण्याच्या कंपनीच्या नव्या दृष्टिकोनाचे प्रतीक असल्याचे स्पष्ट करण्यात आले आहे.
महाराष्ट्र राज्य सरकारच्या धारावी रिडेव्हलपमेंट प्रोजेक्ट (डीआरपी) झोपडपट्टी पुनर्वसन प्राधिकरण (एसआरए) आणि अदाणी ग्रुप यांच्या भागीदारीतून साकारण्यात आलेला एनएमडीपीएल हा विशेष हेतू प्रकल्प (एसपीव्ही) आहे. या प्रकल्पाचे केवळ नाव बदलले असून राज्य सरकारची यातील भूमिका आणि भागीदारी आजही कायम आहे. तसेच, धारावीतील रहिवाशांच्या सर्वांगीण विकासाला चालना देणारा सर्वसमावेशक विकास करण्याच्या एनएमडीपीएलच्या भूमिकेत यामुळे कोणताही बदल होणार नाही, असे सांगण्यात आले.
धारावी पुनर्विकास प्रकल्पाची संपूर्ण जबाबदारी वास्तविकरित्या धारावी रिडेव्हलपमेंट प्रोजेक्ट (डीआरपी) या राज्य सरकारच्या प्राधिकरणाकडे आहे. या प्राधिकरणाच्या नावासोबत साधर्म्य असलेल्या डीआरपीपीएल या कंपनीच्या आधीच्या नावामुळे अनेकदा तांत्रिक अडचणी निर्माण होत होत्या. त्या टाळण्यासाठी या नामांतराचा उपयोग होऊ शकेल. नाव बदलले तरीही राज्य सरकारच्या
डीआरपी या प्राधिकरणाच्या देखरेखीतच धारावी पुनर्विकास प्रकल्प पूर्ण केला जाणार आहे, असेही कंपनीने स्पष्ट केले आहे. झोपडपट्टीमुक्त भारताचे स्वप्न पूर्ण करण्यासाठी धारावी पुनर्विकास प्रकल्प हे महत्त्वाचे पाऊल ठरणार असून एनएमडीपीएल नावातून देशाला झोपडपट्टीमुक्त करण्याचे स्वप्न अधोरेखित केले जात असल्याचे सांगण्यात आले.
नवभारत म्हणजेच नवा भारत...
कंपनीने म्हटले आहे की, नवभारत म्हणजेच नवा भारत. मेगा या शब्दातून या प्रकल्पाची भव्यता अधोरेखित होते. तर डेव्हलपर्स (विकासक) यातून सुखसुविधांसह एक अदयावत समाज घडवण्यासाठी किंवा समाजाचा विकास करण्यासाठी कंपनीच्या जबाबदारीची जाणीव प्रतीत होते.