गणराय म्हणजे विद्येची, कलेची देवता. लहानांपासून ज्येष्ठांपर्यंत सर्वांना हवाहवासा असणारा गणराय आणि त्याचा उत्सव अवघ्या ३० दिवसांवर येऊन ठेपला आहे. देशभरात गणेशोत्सवाची लगबग सुरू झाली आहे; परंतु चित्रकार नामदेव पाटील यांनी आपल्या कलेतून गणरायाला उत्सवापूर्वीच मानवंदना दिली आहे. पेस्टल, पेन्सिल, जलरंग अशा माध्यमांचा कल्पकतेने वापर करत गणेशाची विविध रूपे पाटील यांनी साकारली आहेत. मंगळवार, २ ऑगस्टपासून मुंबईतील जहांगीर आर्ट गॅलरी येथे श्री गणेशाच्या विविध रूपांच्या कलाकृतींचे प्रदर्शन रसिकांना पाहता येणार आहेत. ८ ऑगस्टपर्यंत सुरू राहणारे प्रदर्शन सकाळी ११ ते संध्याकाळी ७ वाजेपर्यंत विनामूल्य पाहता येईल.

अनेक कलाकार-चित्रकार आपल्या निरीक्षणातून, श्रद्धेतून जे काही अनुभवास येते ते चित्ररूपी साकारण्याचा प्रयत्न करतात. कोणी निसर्गावर प्रेम करतो, तर कोणी विविध प्रांतातल्या जीवनशैलीवर. कोणी पक्षी-प्राण्यांवर, तर कोणी देव-देवतांवर. असेच एक चित्रकार नामदेव पाटील यांनी आपल्या कलेतून कायम गणरायाला मानवंदना दिली आहे. यंदाही त्यांचे गणेशाच्या विविध रूपांचे चित्रप्रदर्शन मुंबईतील काळा घोडा येथे २ ऑगस्ट ते ८ ऑगस्टपर्यंत आयोजित करण्यात आले आहे. गणेशोत्सवाआधी रसिकांना खास करून गणेशभक्तांना या प्रदर्शनाद्वारे एक सुंदर अनुभव अनुभवण्याची संधी मिळणार आहे.