IMD Alert: गुरुवारी (२५ जुलै) मुंबई शहर आणि उपनगरात पावसाच्या सरी कोसळत आहेत. शहरात अनेक भागात पाणी साचले आहे. भारतीय हवामान केंद्र, कुलाबा यांच्या वतीने, मुंबई महानगराला उद्या (२६ जुलै) सकाळी ८.३० वाजेपर्यंतच्या कालावधीसाठी रेड अलर्टचा इशारा देण्यात आला आहे. या पार्श्वभूमीवर, मुंबईकर नागरिकांना महानगरपालिका प्रशासनाकडून विनंती करण्यात आली आहे की, कृपया आवश्यक असेल तरच घराबाहेर पडावे आणि प्रशासनाला सहकार्य करावे.
गेल्या काही दिवसांपासून मुसळधार पाऊस पडत असलेल्या भारताच्या आर्थिक राजधानी मुंबईला मंगळवारी सकाळी मुंबईला मुसळधार पावसाचा तडाखा बसला आहे.
बीएमसीने पाणी कपात घेतली मागे
बीएमसी २९ जुलैपासून १० टक्के पाणीकपात मागे घेणार आहे. ही कपात ५ जून रोजी लागू करण्यात आली होती. परंतु सध्या मुंबईला पाणीपुरवठा करणारे चार तलाव ओसंडून वाहत आहेत. शहराला पाणीपुरवठा करणाऱ्या सात तलावांमधील एकूण पाणीसाठा गुरुवारी त्यांच्या एकूण क्षमतेच्या ६६ टक्क्यांवर पोहोचला आहे.
प्रशासनाने दिला पावसाचा इशारा
मंत्रालयातून नागरिकांना फोन मेसेजद्वारे प्रशासनाने सतर्कतेचा इशारा दिला आहे. ' भारतीय हवामान विभागाने मुंबई, मुंबई उपनगर, पुणे , ठाणे , रायगड जिल्ह्यात अति मुसळधार पावसाचा इशारा दिला आहे. तरी नागरिकांनी सतर्क राहावे. व प्रशासनाने दिलेल्या सूचनांचे पालन करावे.'
मुंबई महानगराला पाणीपुरवठा करणाऱ्या जलाशयांच्या क्षेत्रात दमदार पाऊस
मुंबई महानगराला पाणीपुरवठा करणाऱ्या जलाशयांच्या क्षेत्रात दमदार पाऊस सुरू आहे. परिणामी पाणीसाठ्यात सातत्याने वाढ होत आहे.
> सद्यस्थितीत विहार, तुळशी, तानसा, मोडकसागर ही चार जलाशये ओसंडून वाहू लागली आहेत. आज सकाळी ६ वाजेपर्यंत पाणीसाठा ६६.७७ टक्के इतका नोंदवण्यात आला आहे.
> या संपूर्ण स्थितीचा आढावा लक्षात घेता, मुंबई महानगराच्या पाणीपुरवठ्यात सध्या लागू असलेली १० टक्के पाणी कपात ही सोमवार दिनांक २९ जुलै २०२४ पासून मागे घेण्यात येत आहे.
> तसेच, ठाणे शहर, भिवंडी व नगर बाह्य विभागातील ग्रामपंचायतीना बृहन्मुंबई महानगरपालिकेकडून होणा-या पाणीपुरवठ्यातील १० टक्के कपात देखील सोमवार दिनांक २९ जुलै २०२४ पासून मागे घेण्यात येत आहे.