मुंबईतील जहांगीर आर्ट गॅलरी येथे जेष्ठ चित्रकर्ती शोभा पत्की यांच्या चित्रांचे एकल प्रदर्शन आयोजित करण्यात आले आहे. 'माझी चित्रनिर्मिती' प्रदर्शनाला मंगळवार २९ नोव्हेंबरपासून सुरुवात झाली आहे. हे प्रदर्शन ५ डिसेंबरपर्यंत रोज सकाळी ११ ते संध्याकाळी ७ वाजेपर्यंत विनामूल्य रसिकांना पाहता येणार आहे. त्यांच्या ४० वर्षांच्या कला प्रवासात त्यांनी काढलेल्या विविध विषयांवरील वेगवेगळ्या माध्यमातील व शैलीतील चित्रांचा या प्रदर्शनात समावेश केला आहे.

प्रस्तुत चित्र प्रदर्शनात पत्की यांनी ज्यूट, प्लॅस्टर, कापड, माती, ॲल्युमिनियम, तेलरंग, मिक्स मिडियम अशा माध्यमांचा कलात्मक वापर केला आहे. आपली आशयघन चित्रे अपेक्षित व सौंदर्ययुक्त आविष्काराने अलंकृत केले आहेत. अनेक विविधलक्षी व आकर्षक विषयांवर आधारित असलेल्या त्यांच्या चित्रसंपदेत भारतीय संस्कृती व परंपरा, धार्मिक संकल्पना, निसर्गवैभव, ऋतुचक्र, रागमाला, ब्रह्मांड वगैरेंचे रम्य व आकर्षक दर्शन सर्वांना घडते. पारंपारिकतेला आधुनिकतेचा साज चढवून त्यातून साकारलेली कलारूपे भारतीय कला संस्कृतीचे वैभव व रूढी परंपरेचे महत्त्व आणि गौरवशाली ऐतिहासिक परंपरा वगैरे फार उत्कटतेने त्यांनी प्रदर्शित केली असून योग्य रंग लेखनातून व पोतातून तसेच अन्य आविष्कारातून दिलेली ती सौंदर्यपूर्ण कलारूपे त्यांनी साकारली आहेत.