मुंबई : मराठा आरक्षण आंदोलनकर्त्यांनी एका प्रवाशाला मारहाण करून बेस्ट बसची तोडफोड केल्याप्रकरणी अज्ञात १० जणांविरोधात गुन्हा दाखल करण्यात आला आहे.
जुहू डेपोवर रविवारी सायंकाळी बसमध्ये बसण्याच्या वादावरून आंदोलनकर्त्यांनी एका प्रवाशाला मारहाण करून बसची काच फोडली, अशी माहिती पोलिसांनी दिली. घटना घडली तेव्हा बस डेपोत उभी होती आणि चालक, वाहक तेथे नव्हते.
व्हायरल झालेल्या व्हिडीओमध्ये भगवे टोपी, गमछे घातलेले आंदोलनकर्ते आणि काही प्रवासी एकमेकांना मारताना दिसत आहेत.
बस कर्मचारी घटनास्थळी पोहोचल्यावर पोलिसांना खबर दिली गेली. मात्र, तेव्हा पर्यंत प्रवासी आणि आंदोलनकर्ते पळून गेले होते.
जुहू पोलिसांनी १० ते १२ अज्ञात आंदोलनकर्त्यांवर दंगल, मारहाण आणि सार्वजनिक मालमत्तेचे नुकसान या गुन्ह्यांखाली प्रकरण दाखल केले आहे.