मुंबई : रुळांची दुरुस्ती ओव्हरहेड वायर दुरुस्ती सिंगल यंत्रणेची दुरुस्ती अशा विविध कामांसाठी रविवार, १४ जानेवारी रोजी हार्बर व पश्चिम रेल्वे मार्गावर दुरुस्तीचे काम हाती घेतले आहे. या कालावधीत काही लोकल उशीराने धावत असून, काही लोकल रद्द करण्यात आल्या आहेत. दरम्यान, मध्य रेल्वेच्या मेन लाईनवर मेगाब्लॉक रद्द करण्यात आल्याचे मध्य रेल्वेकडून सांगण्यात आले.
हार्बर मार्गावर वडाळा रोड ते मानखुर्द दरम्यान अप आणि डाऊन हार्बर लाईन सकाळी ११ ते दुपारी ४ वाजेपर्यंत दुरुस्तीचे काम हाती घेतले आहे. (छत्रपती शिवाजी महाराज टर्मिनस-वांद्रे/गोरेगाव सेवा प्रभावित नाही) तर ब्लॉक कालावधीत वडाळा रोड ते मानखुर्द स्थानकांदरम्यान अप आणि डाऊन हार्बर मार्गावरील लोकल सेवा बंद आहे. दुरुस्तीच्या कालावधीत सीएसएमटी स्थानकातून वाशी, बेलापूर, पनवेलसाठी डाऊन हार्बर मार्गावरील लोकल सेवा आणि वाशी, बेलापूर, पनवेल स्थानकातून सीएसएमटीच्या दिशेने जाणाऱ्या लोकल सेवा बंद आहेत.
दरम्यान, ब्लॉक कालावधीत सीएसएमटी वांद्रे - गोरेगाव दरम्यानच्या उपनगरीय रेल्वे सेवा वेळापत्रकानुसार सुरू आहेत. तर पनवेल ते मानखुर्द दरम्यान, विशेष लोकल सेवा चालवण्यात येत आहेत.
मेन लाईनवर प्रवासाची मुभा
हार्बर मार्गावरील प्रवाशांना ब्लॉक कालावधीत सकाळी १० ते दुपारी ४.३० पर्यंत ट्रान्स हार्बर लाईन आणि मेन लाईनवरून प्रवास करण्याची परवानगी आहे. पश्चिम रेल्वे मार्गावर सांताक्रुझ गोरेगाव दरम्यान अप व डाऊन जलद मार्गावर दुरुस्तीचे काम सुरू आहे. दुरुस्तीच्या कालावधीत सांताक्रुझ गोरेगाव स्थानकादरम्यान जलद मार्गावरील लोकल धीम्या मार्गावर वळवण्यात आल्या आहेत. बोरिवली व अंधेरीला जाणाऱ्या लोकल गोरेगाव स्थानकापर्यंत चालवण्यात येत आहेत.