मुंबई : बच्चे कंपनीसह मोठ्यांचेही मनोरंजन करणाऱ्या राणीच्या बागेत म्हणजेच भायखळा येथील वीरमाता जिजामाता भोसले उद्यान व प्राणी संग्रहालयात लवकरच आंतरराष्ट्रीय दर्जाचे मत्स्यालय उभारण्यात येणार आहे. हे मत्स्यालय पेंग्विन कक्षाजवळच तयार करण्यात येणार आहे. या ठिकाणी विविध प्रकारचे व आकाराचे मासे पाहता येणार आहे. यासाठी पालिका प्रशासन एकूण ७० कोटी खर्च करणार असल्याची माहिती पालिका प्रशासनाने दिली.
राणी बागेतील इंटरप्रिटेशन सेंटर इमारतीच्या तळमजल्यावर आंतरराष्ट्रीय दर्जाचे मत्स्यालय उभारण्याचा निर्णय घेण्यात आल्यानंतर याची निविदा प्रक्रिया अंतिम करण्यात आली आहे. प्राणी संग्रहालयातील जागेची मर्यादा लक्षात घेऊन मासे तसेच जलचरांच्या प्रजातींची संख्या वाढविणे शक्य आहे. यानुसार मत्स्यालयाची संकल्पना मांडण्यात आली होती. मागवलेल्या निविदेमध्ये एस. के. एस. कारकाला ही कंपनी पात्र ठरली. या प्रकल्पासाठी विविध करांसह तब्बल ७० कोटी रुपये खर्च करण्यात येणार आहे. या कंपनीने कुर्ला नेहरू नगर येथील महापालिका शालेय इमारतीच्या पुनर्बांधणीचे काम केले आहे. परंतु या कंपनीने मत्स्यालय बनवणाऱ्या कंपन्यांशी करार केल्यामुळे निविदा अटींमध्ये ही कंपनी पात्र ठरल्याने याची निवड करण्यात आली आहे, अशी माहिती पालिकेच्या अधिकाऱ्यांनी दिली.
असे असेल मत्स्यालय
या मत्स्यालयाच्या बांधकामामध्ये घुमटाकार मत्स्यालय, पद भ्रमण बोगदा मत्स्यालय, पॉप-अप विंडो आदींची सुविधा असेल. आयताकृती आणि वर्तुळाकार टाक्या बोगद्या मत्स्यालयाव्यतिरिक्त, या मत्स्यालयात ॲक्रिलिक पॅनल्समध्ये बनवलेले ४ आयताकृती टाक्या, ५ वर्तुळाकार टाक्या आणि ०२ अर्धगोलाकार टाक्या बनवण्यात येणार आहेत. ज्यामध्ये विविध प्रकारचे मत्स्यजीव प्रदर्शित केले जातील, अशी माहिती अधिकाऱ्यांनी दिली आहे. जलचरांसाठी मत्स्यालयाअंतर्गत नैसर्गिक वातावरण तयार करण्यासाठी कृत्रिम रॉक वर्कची व्यवस्था करण्यात येणार आहे.