बहीण-भावाच्या प्रेमाचे प्रतिक असलेल्या रक्षाबंधन हा सण मुंबईसह महाराष्ट्रात मोठ्या उत्साहात पारंपरिक पद्धतीने साजरा करण्यात आला.
मुंबई व ठाण्यात पावसाची जोरदार बॅटिंग सुरू असतानाही रक्षाबंधनाचा उत्साह जोरात होता. आपल्या लाडक्या भावाला भेटण्यासाठी महिला वर्ग सकाळपासूनच सज्ज झाला होता. लोकल गाड्यांना नेहमीपेक्षा मोठी गर्दी होती. बस, खासगी गाड्यांतून बहिण-भाऊ एकमेकांना भेटण्यासाठी निघाले होते. चिमुकले भाऊ-बहिणी एकमेकांना भेटण्यासाठी आतुर झाले होते. आपल्या लाडक्या भावासाठी राखी घ्यायला दुकानांमध्ये झुंबड उडाली होती. तसेच मिठाईच्या दुकानातही गर्दी होती. मुख्यमंत्री एकनाथ शिंदे व उपमुख्यमंत्री देवेंद्र फडणवीस यांना विधान भवनातील महिला पोलीस कॉन्स्टेबलनी राखी बांधली.
तसेच ठाणे मेंटल रुग्णालयातील रुग्णांना स्वयंसेवी संस्थांच्या प्रतिनिधींनी राख्या बांधल्या. रुग्णांना राख्या बांधताच त्यांच्या चेहऱ्यावर आनंद पसरला, असे रुग्णालयाचे अधीक्षक डॉ. नेताजी मुळीक यांनी सांगितले. तर सेंट्रल जेलचे अधीक्षक हर्षद अहिरराव म्हणाले की, तुरुंगातील कर्मचाऱ्यांनीही हा सण साजरा केला. ठाणे जिल्हा रुग्णालयात स्वयंसेवी संस्था व राजकीय पक्षाच्या नेत्यांनी रुग्णांना फळांचे वाटप केले.