मुंबई : विविध कामांसाठी दर रविवारी घेण्यात येणारा मेगा ब्लॉक रविवार २४ सप्टेंबर रोजी रद्द करण्यात आला आहे. त्यामुळे मध्य, हार्बर व पश्चिम रेल्वे मार्गावरील प्रवाशांसह गणेश भक्तांना दिलासा मिळाला आहे.
गणपती उत्सवादरम्यान प्रवाशांच्या सोयीसाठी, मध्य रेल्वे रविवार २४ सप्टेंबर रोजी छत्रपती शिवाजी महाराज टर्मिनस-कल्याण सेक्शन मेन लाईन आणि छत्रपती शिवाजी महाराज टर्मिनस-पनवेल हार्बर लाईनसह ट्रान्स-हार्बर लाईन आणि बी एस यू लाईन उपनगरीय सेक्शनवर मेगा ब्लॉक रद्द करण्यात आल्याचे रेल्वे प्रशासनाकडून सांगण्यात आले.
पश्चिम रेल्वे मार्गावर शनिवारी रात्रकालीन ब्लाॅक!
बोरिवली - भाईंदर स्थानकादरम्यान जलद मार्गावर शनिवारी रात्री १२.३० ते रविवार पहाटे ४.३० वाजेपर्यंत दुरुस्तीचे काम हाती घेण्यात येणार आहे. दुरुस्तीच्या कालावधीत बोरिवली - भाईंदर स्थानकादरम्यान जलद मार्गावरील लोकल धीम्या मार्गावर वळवण्यात येतील.
गुरुवारी चर्चगेट मुंबई सेंट्रल दरम्यान थांबा !
गुरुवार २८ सप्टेंबर रोजी लाडक्या गणरायाचे विसर्जन होणार आहे. या दिवशी भक्तांची गैरसोय होऊ नये यासाठी चर्चगेट ते मुंबई सेंट्रल स्थानकादरम्यान सायंकाळी ५ ते रात्री १०.३० वाजेपर्यंत दरम्यान लोकल थांबतील. तर चर्चगेट स्थानकातून सुटणाऱ्या लोकल चर्नी रोड स्थानकांत थांबणार नाही.