पित्याला मानसिक व शारीरिक त्रास देणार्या मुलीविरुद्ध सांताक्रुज पोलिसांनी गुन्हा नोंदविला आहे. पूजा मेहरा असे ४८ वर्षीय मुलीचे नाव असून तिची पोलिसांकडून चौकशी होणार आहे. क्रिशन मेहरा (८१) हे सांताक्रुझ येथे राहत असून त्यांच्या टेक्सटाईल्स प्रिटींगचा व्यवसाय होता. त्यांच्या पत्नीचे २००५ साली कॅन्सर या आजाराने निधन झाले होते. त्यांना राजा नावाचा एक मुलगा असून तो त्याच्या कुटुंबियांसोबत वांद्रे येथे राहतात, तर त्यांची अविवाहीत मुलगी पूजा (४७) ही त्यांच्यासोबत राहते.
दोन्ही मुलांचे शिक्षणासह त्यांना स्वतच्या पायावर उभे राहण्यासाठी त्यांनी प्रयत्न केले. मुलगा वेगळा राहण्यासाठी गेल्यानंतर त्याला सोने आणि काही रक्कम त्यांच्या प्रॉपटीतून दिली होती. पूजाने फॅशन डिझायनिंगचे शिक्षण घेतले असून तिला उच्च शिक्षणासाठी लंडन येथे पाठविले होते. तरीही पूजा ही काहीच काम करत नव्हती. त्यांच्याच पैशांवर उधळपट्टी करत होती. अनेकदा पैशांवरुन ती तिच्या वडिलांना मारहाण करत होती. घरातील नोकरांशी क्षुल्लक कारणावरुन वाद घालत होती. गेल्या १० वर्षांपासून त्यांचा त्यांच्याच मुलीकडून प्रचंड मानसिक व शारीरिक शोषण सुरू होते. अनेकदा ते हॉटेलमध्ये राहत होते. कार घेऊन बॅण्डस्टॅण्डला जाऊन कारमध्ये झोपत होते. क्रिशन यांनी त्यांचे फ्लॅट विकून तिला तिचा हिस्सा द्यावा, जेणेकरुन ती कायमची लंडनला स्थायिक होईल यासाठी दबाव आणत होती.