मुंबई : अल्पवयीन मुलीवर बलात्कार केल्याप्रकरणी जोधपूर मध्यवर्ती कारागृहात जन्मठेपेची शिक्षा भोगत असलेला स्वयंभू धर्मगुरू आसाराम बापू याला रायगड जिल्ह्यातील खोपोली येथील माधवबाग वैद्यकीय केंद्रात आणण्यात आले आहे. हृदयाशी संबंधित आजारावर उपचारासाठी आसाराम बापू याला आणण्यात आल्याचे अधिकाऱ्यांनी सांगितले.

८३ वर्षीय आसाराम याला सप्टेंबर २०१३ मध्ये अटक करण्यात आली होती. आसाराम याला खोपोली येथील आयुर्वेदिक रुग्णालयाच्या हृदयरोग निवारण केंद्रात मंगळवारी रात्री ८ च्या सुमारास पोलीस संरक्षणात आणण्यात आल्याचे एका वरिष्ठ पोलीस अधिकाऱ्याने सांगितले. आसारामवर पुढील सात दिवस हृदयाशी संबंधित काही आजारांवर उपचार केले जातील, असेही सांगण्यात आले. राजस्थान उच्च न्यायालयाने आसारामला १३ ऑगस्ट रोजी महाराष्ट्रातील आयुर्वेदिक रुग्णालयात उपचार घेण्याची परवानगी दिली होती. त्यानुसार, आसारामला येथे आणण्यात आले. येथे पोलिसांनी बंदोबस्त वाढवला आहे.