नवी दिल्ली : दिल्ली उच्च न्यायालयाने भारतीय क्रिकेट संघाचे मुख्य प्रशिक्षक गौतम गंभीर यांच्याविरुद्ध परवान्याशिवाय ड्रग्जचा साठा आणि वितरण केल्याबद्दलचा फौजदारी खटला रद्द केला आहे. न्यायमूर्ती नीना बंसल कृष्णा शुक्रवारी याप्रकरणी निर्णय देताना सांगितले की, गंभीर आणि त्यांच्या फाऊंडेशनविरुद्धची फौजदारी तक्रार रद्द करण्यात येत आहे. तीन वर्षांपूर्वी, २० सप्टेंबर २०२१ रोजी उच्च न्यायालयाने या प्रकरणातील कोणत्याही कार्यवाहीवर अंतरिम स्थगिती दिली होती. गंभीर, त्याची पत्नी, आई आणि फाउंडेशनविरुद्ध जारी केलेल्या कनिष्ठ न्यायालयाच्या समन्सला आव्हान देणाऱ्या याचिकेत फौजदारी तक्रार रद्द करण्याची मागणीही करण्यात आली होती.
२०२१ मध्ये गंभीरचे कार्यालय गरजूंना कोविड औषधे वाटप करत होते. विरोधकांनी हा साठा बेकायदेशीर असल्याचा आरोप केला. तथापि, गंभीरने हे मानवतावादी कृत्य आहे आणि त्यात कोणालाही इजा झाली नाही, असा दावा केला. त्यानंतर, ट्रायल कोर्टाने आरोपींविरुद्ध समन्स जारी केले होते.