रांची : झारखंडचे माजी मुख्यमंत्री व झारखंड मुक्ती मोर्चाचे माजी नेते चंपाई सोरेन यांनी शुक्रवारी भाजपमध्ये प्रवेश केला.

येथे झालेल्या कार्यक्रमात प्रदेश भाजपने सोरेन यांना पक्षाचे सदस्यत्व दिले. यावेळी आसामचे मुख्यमंत्री हिमंत बिस्व सरमा व केंद्रीय कृषी मंत्री शिवराजसिंह चौहान उपस्थित होते.

भाजपमध्ये दाखल झाल्यानंतर चंपाई यांनी हेमंत सोरेन यांच्यावर हेरगिरी करण्याचा आरोप केला. ते म्हणाले, माझी दिल्लीपर्यंत हेरगिरी केली. झारखंड मुक्ती मोर्चाचे मी राज्यात भरपूर काम केले. त्याच पक्षातून मला बाहेर काढले. पक्षात माझा अपमान झाला. त्यामुळे मी राजकीय संन्यास घेण्याचे ठरवले. पण, राज्यातील जनतेचे प्रेम व समर्थन पाहून राजकारणात राहण्याचा निर्णय मी घेतला. मी संघर्ष करणारा माणूस असून, आयुष्यात अनेक चढ-उतार बघितले आहेत. स्वत: पक्ष बनवेन किंवा चांगला पक्ष मिळाल्यास त्यात सामील होऊ, असा विचार मी केला होता. मी अनेक पक्षांचा विचार केला. देशात भाजप व काँग्रेस हे दोन मोठे पक्ष आहेत. पण, काँग्रेसने आंदोलनामध्ये आदिवासींवर गोळीबार केला. त्यामुळे भाजपमध्ये जाण्याचा निर्णय घेतला. संथाल परगणा व आदिवासींना वाचवण्याचे काम केवळ भाजपच करू शकतो, असे सोरेन म्हणाले.