नवी दिल्ली : एप्रिल ते जून दरम्यान पूर्व, मध्य आणि वायव्य भारताच्या काही भागांसह दक्षिण-पूर्व द्वीपकल्पात नेहमीपेक्षा जास्त दिवस उष्णतेची लाट येणार आहे, असा अंदाज भारतीय हवामानशास्त्र विभागाने मंगळवारी जाहीर केला आहे. यामुळे घराबाहेर पडताना नागरिकांना टोपी, छत्री, गमछा आदींचा वापर करावा लागणार आहे.
एप्रिल ते जून या काळात देशाच्या बहुतांश भागांत कमाल तापमान सामान्य किंवा त्यापेक्षा कमी राहण्याची अपेक्षा आहे. मात्र, पूर्व आणि ईशान्य भारत, मध्य भारताचा पूर्व भाग आणि लगतच्या द्वीपकल्पीय प्रदेशांमध्ये कमाल तापमान सामान्यपेक्षा जास्त राहण्याची शक्यता आहे.
उन्हाळ्याच्या हंगामात देशाच्या बहुतांश भागांत किमान तापमान सामान्यपेक्षा जास्त राहण्याची शक्यता आहे. केवळ महाराष्ट्र आणि तेलंगणातील काही भाग याला अपवाद असू शकतात, जिथे किमान तापमान सामान्य किंवा त्यापेक्षा कमी राहण्याची शक्यता आहे.
हवामान विभागाने सांगितले की, एप्रिलमध्ये देशाच्या अनेक भागांत मासिक कमाल तापमान सामान्य किंवा त्यापेक्षा कमी राहण्याची शक्यता आहे. तरीही, या महिन्यात खालील क्षेत्रांत तापमान वाढलेले दिसेल. एप्रिलमध्ये दक्षिण द्वीपकल्पातील काही विखुरलेले भाग वगळता (जिथे तापमान सामान्य असेल), संपूर्ण भारताच्या बहुतांश भागांत मासिक किमान तापमान सामान्यपेक्षा जास्त राहण्याची शक्यता आहे.
पावसाचा अंदाज
२०२६ च्या एप्रिल महिन्यातील पावसाचे सरासरी प्रमाण संपूर्ण देशात ‘सामान्यपेक्षा जास्त’ राहण्याची दाट शक्यता आहे. ईशान्य भारत वगळता देशाच्या बहुतांश भागांत सामान्य ते सामान्यपेक्षा जास्त पाऊस पडण्याची शक्यता आहे. मात्र, ईशान्य भारताच्या अनेक भागांत पावसाचे प्रमाण सामान्यपेक्षा कमी राहण्याची शक्यता आहे.
'या' भागात तापमान वाढणार
पूर्व आणि ईशान्य भारताचे अनेक भाग.
वायव्य भारताचे काही भाग.
दक्षिण द्वीपकल्पीय भारताचे काही भाग.