वडोदरा : वडोदरानजीकच्या हरणी तलाव बोट दुर्घटनेसंबंधात तेथील रिक्रिएशनल झोनचा सारा कारभार पाहणाऱ्या परेश शहा याला गुरुवारी पोलिसांनी अटक केली. हरणी तलावात शालेय सहलीची बोट बुडून १४ विद्यार्थी व २ शिक्षिका बुडून मरण पावल्या होत्या. या प्रकरणी आतापर्यंत पोलिसांनी १९ जणांची नावे एफआयआरमध्ये नोंदविली आहेत, त्यातील ९ जणांना आतापर्यंत अटक केली आहे.
हरणी परिसरातील मोटनाथ तलावात बोटी चालवण्याचे आणि इतर मनोरंजनाचे काम करण्यासाठी नागरी संस्थेने कोटिया प्रकल्पात ज्याचे कुटुंबीय भागीदार आहेत, परेश शहा या व्यक्तीला गुरुवारी सकाळी शहराच्या बाहेरील महामार्गावरून अटक करण्यात आली. असे एका वरिष्ठ पोलीस अधिकाऱ्याने सांगितले.
कोटिया प्रकल्पांचे एकूण कामकाज शहा हाताळत होते आणि दुर्घटनेनंतर ते फरार असल्याचे तपासात समोर आले आहे. लेक झोनमधील कंपनीचे कर्मचारी शहा यांना तक्रार करायचे. आम्ही त्याला शहराच्या बाहेरून अटक केली आहे. इतरांना पकडण्यासाठी प्रयत्न सुरू आहेत, असे पोलीस उपायुक्त पन्ना मोमाया यांनी सांगितले.
कागदोपत्री शहा औपचारिकपणे फर्मशी संबंधित नसले तरी त्यांची पत्नी, मुलगा आणि मुलगी या फर्मशी भागीदार म्हणून संबंधित आहेत आणि एफआयआरमध्ये आरोपी म्हणून त्यांचे नाव देखील नोंदवले गेले आहे, असे अधिकाऱ्याने सांगितले.