सर्फराझला उत्तर प्रदेशला पाठवण्याचा निर्णय चुकला. सध्या तो कारकीर्दीतील सर्वोत्तम लयीत असून लवकरच त्याला भारतीय संघात स्थान मिळेल, अशी आशा आहे. त्याला भारताच्या कसोटी संघाकडून खेळताना पाहण्याचे माझे स्वप्न आहे, अशी प्रतिक्रिया सर्फराझचे वडील नौशाद खान यांनी व्यक्त केली.

२४ वर्षीय सर्फराझने काही वर्षांपूर्वी रणजीच्या तीन हंगामांतील अवघ्या आठ सामन्यांत उत्तर प्रदेशचे प्रतिनिधित्व केले. त्यानंतर मात्र सर्फराझ पुन्हा मुंबईत परतला आणि त्याने मागे वळून पाहिले नाही. सध्या कामगिरीतील सातत्यामुळे त्याने निवड समितीचे दार ठोठावले आहे, असे म्हटले तर वावगं ठरणार नाही. “सर्फराझला उत्तर प्रदेशला पाठवण्याचा निर्णय सर्वस्वी माझा होता. गेल्या दोन हंगामांपासून त्याने खोऱ्याने धावा काढल्या आहेत. परंतु आजही मी त्याला निकालाकडे लक्ष न देण्याचे सुचवतो. भारतीय संघात त्याला स्थान एक दिवशी नक्कीच मिळेल. सर्फराझला भारताच्या कसोटी गणवेशात खेळताना पाहायला नक्कीच आवडेल,” असे नौशाद म्हणाले.