भिवंडी : ठाणे-भिवंडी वाहिनीवरील कशेळी गावच्या हद्दीतील निसार ऑईल डेपोसमोर भरधाव वेगात जाणाऱ्या टेम्पोचालकाने दुचाकीस्वारास जोरदार धडक दिली असता झालेल्या अपघातात दुचाकीस्वाराचा जागीच मृत्यू झाल्याची घटना समोर आली आहे.
रमजान मुतालीब खान (३५) असे अपघातात मयत पावलेल्याचे नाव आहे. तर याप्रकरणी टेम्पोचालकाच्या विरोधात नारपोली पोलीस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार,५ नोव्हेंबर रोजी रात्रीच्या सुमारास मयत रमजान हा दुचाकीने जात असताना त्याला पाठीमागून आलेल्या आयशर टेम्पोचालकाने जोरदार धडक दिली. या धडकेत रमजानचा जागीच मृत्यू झाला.
दरम्यान, या घटनेनंतर टेम्पोचालक फरार झाला असून याप्रकरणी नारपोली पोलीस ठाण्यात टेम्पोचालकाविरोधात गुन्हा दाखल करण्यात आला आहे. पुढील तपास पोउनि संतोष शिंदे करीत आहेत.