NEET-UG २०२६ ची फेरपरीक्षा देणाऱ्या विद्यार्थ्यांसाठी मध्य आणि पश्चिम रेल्वेने महत्त्वाचा निर्णय घेतला आहे. २१ जून रोजी होणाऱ्या NEET परीक्षेच्या पार्श्वभूमीवर मुंबई उपनगरीय रेल्वे मार्गावरील नियमित मेगाब्लॉक रद्द करण्यात आला आहे. विद्यार्थ्यांना परीक्षा केंद्रांपर्यंत पोहोचताना कोणतीही अडचण येऊ नये आणि लोकल सेवा सुरळीत सुरू राहावी यासाठी हा निर्णय घेण्यात आला आहे.

मध्य आणि पश्चिम रेल्वेची घोषणा

पश्चिम रेल्वेने मंगळवारी (दि. १६) जाहीर केले की, २१ जून रोजी उपनगरीय मार्गावर कोणताही जम्बो ब्लॉक घेण्यात येणार नाही. त्यामुळे लोकल सेवा नियमितपणे सुरू राहतील. रेल्वे प्रशासनाच्या मते, मुंबई महानगर प्रदेशातील विविध परीक्षा केंद्रांवर जाणाऱ्या हजारो विद्यार्थ्यांना याचा फायदा होणार आहे.

मध्य रेल्वेनेही २१ जून रोजी उपनगरीय मार्गावर मेगाब्लॉक घेणार नसल्याचे स्पष्ट केले आहे. मात्र त्या दिवशी लोकल सेवा रविवारच्या वेळापत्रकानुसार धावणार की नियमित कामकाजाच्या दिवसांप्रमाणे चालणार, याबाबत अद्याप स्पष्टता आलेली नाही.

टेलिग्रामवरही निर्बंध

दरम्यान, NEET फेरपरीक्षेच्या पार्श्वभूमीवर केंद्र सरकारने टेलिग्रामवरही तात्पुरते निर्बंध लागू केले आहेत. २१ जूनच्या परीक्षेआधी प्रश्नपत्रिका मिळवून देण्याचे खोटे दावे, फसवणूक आणि दिशाभूल करणाऱ्या संदेशांवर आळा घालण्यासाठी भारतातील टेलिग्रामवरील प्रवेश २२ जूनपर्यंत मर्यादित करण्यात आला आहे. तसेच ३० जूनपर्यंत मेसेज एडिट करण्याची सुविधाही बंद ठेवण्यात आली आहे.

NTA ने विद्यार्थ्यांना अफवांवर विश्वास न ठेवण्याचे आणि केवळ अधिकृत संकेतस्थळावरील माहितीलाच प्राधान्य देण्याचे आवाहन केले आहे.

NEET फेरपरीक्षा का?

३ मे रोजी झालेली NEET-UG २०२६ परीक्षा प्रश्नपत्रिका फुटल्याच्या आरोपांनंतर रद्द करण्यात आली होती. त्यानंतर राष्ट्रीय परीक्षा संस्थेने २१ जून रोजी फेरपरीक्षा घेण्याचा निर्णय घेतला आहे.

देशभरातील लाखो विद्यार्थी या परीक्षेला बसणार असून, विद्यार्थ्यांचा प्रवास आणि परीक्षा प्रक्रिया सुरळीत पार पडावी यासाठी रेल्वे प्रशासनासह विविध यंत्रणा सज्ज करण्यात आल्या आहेत.